نكت المدرسة

من طرف درميكي الجمعة أبريل 26, 2013 4:14 pm

هادا واحد المعلم تعين ف واحد لقرية ف لعروبية. واحد النهار دّا الكاشير للقسم و سول التلاميد: ما هذا؟
حتى واحد ما قشع أشنو داكشي. شوية و هو يهز واحد التلميد صبعو: هاديك ممحاة ديال ستاشرمية

واحد الاستاذ قال لواحد التلميذ: صرف
Verbe "Dire" au présent de l'indicatif
الولد ماعرفش الجواب وبقى ساكت
قال ليه الاستاذ: أنا نعاونك في الاولى، و انت كمل
Je dis
الدري تفتحو عينيه من الفرحة و بدا
Vendredi
Samedi
Dimanche

هادي واحد المعلمة رسمات للدراري تراكتور و سولاتهم واش عرفوا أشنو سميته.
حتى واحد ماعرفه. واحد شوية وهي تنوض واحد باش يجاوب و الدري تمتام، قال ليها: تر تر تر تر تر تر
وهي تقول ليه: أنا غير سولتك على سميته ماشي قلت ليك دير ليه أمارش

واحد الأستاذ ديال الفرنسية سول التلاميذ ديالو: أشنو كيعجبكم فـي الفرنسية ؟
واحد قال ليه: اكسبريسيون اكريت
Expression écrite
التاني قال ليه: اكسبريسيون أورال
Expression orale
نقز الكسول قال ليه: غاماصي ڤو زافيغ
Ramassez vos affaires

واحد التلميد قال للمعلم: واش ممكن شي واحد يتعاقب على شي حاجة ما دارهاش؟

قال ليه المعلم: لا!

قال ليه التلميد: إيوا راه ما درتش التمارين.

هادا واحد الاستاد قال للتلاميد دياولو: غادي نوريكوم تلالة د الانواع ديال الكعيات
اتصل بواحد النمرة وجاوباتو واحد البنت قال ليها: كاين عمر؟
قالت ليه: لا ما كاينش، النمرة غلط
قال للتلاميد: هادي كاعية
اتصل تاني بنفس النمرة وجابواتو نفس البنت وقال ليها: كاين عمر؟
قالت ليه: قلنا ليك ما كاينش مالك مصدعنا
قال للتلاميد: هادي كاعية كتر
عاود اتصل بنفس النمرة وجابواتو نفس البنت وقال ليها : كاين عمر؟
قالت ليه:ما كاينش ألحمار وما تبقاش تعيط
قال للتلاميد: هادي كاعية بزااااااااااف
ناض واحد الولد قال ليه: أنا غادي نوريك الكعية ديال بصاح
ناض عيط لنفس النمرة وقال ليها: أنا عمر، عيط ليا شي واحد؟

واحد
الولد مكلخ قال لباباه: المعلم ديالنا غير كيخربق، البارح قال لينا خمسة
تساوي جوج زائد تلاتة، واليوم قال لينا خمسة تساوي واحد زائد ربعة.

هادا واحد غير دخل الامتحان ديال الباكالوريا و دغية خرج.
قالو ليه: مالك خرجتي دغية؟
قال ليهوم: قال ليا الوالد جي نتا اللول

واحد المعلم قال للتلاميد دياولو: اللي حاس براسو مكلخ يوقف
سكتوا التلاميد كاملين إلا واحد ناض وقف
قال ليه المعلم: حاس براسك مكلخ؟
قال ليه التلميد: لا، غير ما بغيتكش تبقى واقف بوحدك

هادي واحد المرا كبيرة وحشومية بزاف مشات تقرا ف محو الأمية
وكان العنوان ديال الدرس : دخل أحمد، خرج أحمد
ملي تقول المعلمة: دخل أحمد، كدير المرا الزيف على راسها
وملي تقول المعلمة: خرج أحمد، كتحيد المرا الزيف على راسها
ملي مشات للدار، قال ليها راجلها: آشنو قريتو اليوم؟
قالت ليه: علاه احمد خلانا نقراو؟ ها هو داخل، ها هو خارج

هادا واحد المكلخ ساقط أربع سنين فالتحضيري.

جا عندو المدير، قال ليه: واش نتا غادي تبقى غي لاصق ليا ف هاد المدرسة؟

ناض الدري كعا، هز شكارتو وخرج. قال ليهم: لهلا يداوي بوكم.

كان معول يولي طبيب.

هادا واحد مسيفط ختو تشوف ليه النتائج ديال الامتحانات.
اتفق معاها تقول ليه ف التلفون إيلا سقط ف مادة وحدة: سلم عليك محمد. إيلا
سقت ف جوج مواد: سلموا عليك محمد و محمد. إلخ
المهم مشات البنت تشوف النتائج وعيط ليها خوها، قال ليها: أ من درا؟ قالت ليه ختو: سلمت عليك أمة محمد كلها

واحد الاستاد قال لواحد التلميد: أعرب لنا جملة "ضرب الولد الصرصور"
جاوبه الولد: ضرب فعل إجرام، الطفل ابن حرام، أما الصرصور فهو فاعص مفعوص وعلامة فعصه الضربه القاضيه على رأسه

واحد المرا سولات ولدها: واش نتا عزيز على المعلمة ديالك؟
قال ليها الولد: أه أماما، أنا بوحدي اللي كتقول ليا غادي تبقى معايا العام الجاي

هادا واحد الاستاد كيعلم لواحد التلميد عملية ناقص، قال ليه: جوج ناقص جوج شحال تيبقى ؟
التلميد : معرفتش
الاستاد جبد ليه جوج كرواصات، وقال ليه : شحال هادو؟
التلميد :جوج كرواصات
الاستاد :هاك كول هادي، زيدك هادي، شنو بقى دابا ؟
التلميد: شي بـرّاد ديال اتاي بعقلو

سولوا واحد التلميد: ما هي فوائد الغش في الإمتحان؟

قال ليهم: تقوية عضلة العين والسمع، تقوية العلاقات الاجتماعية، نشر روح التعاون، والنتيجة: إسعاد الوالدين!

هادي واحد البنت وصلات المدرسة معطلة
قال ليها الاستاد: مالكي تعطلتي؟
قالت ليه: راه واحد كان كيتبسل عليا و تابعني
قال ليها المعلم: إيوا إيلا كان شي واحد تابعك غادي توصلي دغية ماشي تعطلي
قالت ليه: راه هو اللي كان كيتمشى بشوية

واحد الولد قال لأمه: مي، محتاجك تمشي معايا غدا للمدرسة
قالت ليه أمه: علاش أولدي؟
قال ليها الولد: قال لينا الاستاد اليوما، اللي ما جاش داير التمارين غدا غادي نضرب مو

المعلم طلب من التلاميد يكتبو إنشاء كل واحد يتخيل راسو مدير شركة.
كلشي بدا كيكتب إلا واحد، ربّع يديه وبدا كيتعنكر
جا عندو المعلم وسولو: علاش مكتكتبش؟
جاوبو التلميذ: كنتسنى السكرتيرة ديالي باش نملي عليها وهي تكتب

واحد المعلم ديال الابتدائي قال للتلاميد دياولو: أنتم رجال المستقبل، أنتم مصابيح الغد
وهو يوقف واحد التلميد وشير لصاحبو اللي ناعس على الطاولة حداه: أستاد أستاد، ها واحد البولة تسوطات

واحد المرا حرقات الضو الحمر، ووقفها البوليسي

قالت ليها: الله يرحم الواليدين، راني معلمة وما بغيتش نتعطل على الحصة ديالي

قال ليها البوليسي: الله! شحال وأنا كنتسنى هاد النهار. يالله جبدي ورقة وستيلو وكتبي "ما عمرني نحرق الضو الحمر" ألف مرة.

هادا واحد الدري جرى عليه الأستاد ديال لانفورماتيك
مللي مشى عند الحارس العام، قال ليه: مالك أولدي؟
قال ليه التلميد: جرى عليا مول السيبير

هادا واحد الولد ساقط ورا النتيجة ديالو لباه. عطاه باه قتلة ديال العصا وقال ليه يا الكسول أشنو كنتي كتدير ملي كانو قرانك كيقراو

منين كمل معاه جات نوبة خوه. ورا لباه النتيجة اللي مكفسة بحالها بحال
ديال خوه. شاف فيها باه وهو يقول ليه: سير أولدي الله يهديك، ولكن العام
الجاي خاصك تدير حسن من هاكا.
الولد اللي كلا العصا بغى يحماق ما فهمش القضية كيدايرة. وهو يسول خوه: كيفاش زعما بجوجنا ساقطين وأنا ناكل العصا ونتا لا؟
قال ليه خوه: حيت حطيت ليه مية درهم ف وسط النتيجة

واحد المعلم عزيزعليه يسلخ الدراري. شد واحد الولد وسولو: باش تغديتي اليوم؟
جاوبو: بالمرقة. هز المعلم العصا وبدا يضرب فيه: ها البطاطا، ها خيزو، ها اللفت، ها اللحم، ها البصلة... حتى شبعو عصا
داز على التلاميد كلهم حتى وصل عند واحد العايق سولو: باش تغديتي؟
هو يقول ليه: بمسكة
وقف المعلم شوية يفكر، وهز العصا حتى السما هو يعطيه: ها الكاغيط الفوقاني، ها الكاغيط التحتاني، ها نضغ نضغ نضغ نضغ

هادي واحد الطلابة قالت لواحد المعلم: الله يرحم الوالدين عطيني باش نفرح الدراري
قال ليها: سيري قولي ليهوم راه ما كايناش القراية غدا

هادا واحد الأستاد نوض واحد الكسول للسبورة، و كتب ليه صفر و سولو: أشنو هادا؟
جاوبو الكسول: صفر
زاد ليه الأستاد تلاتة ديال الأصفار, و عاود سولو: و دابا؟
جاوبو الكسول: صفرالاف و صفرمية و صفرة و صفرين

هادا واحد المعلم رسم سباط ف السبورة وسول واحد التلميد: أشنو هادا؟
قال ليه الولد: هباط
سلخو المعلم مزيان وقال ليه: لا هادا سميتو سباط
الغد ليه عاود المعلم رسم سباط وسول نفس التلميد: أشنو هادا؟
عاود قال ليه الولد: هباط
عاود معاه المعلم نفس السيناريو شحال من مرة ولا بغى الولد يحفض هاديك سباط. المعلم طلع ليه الدم، وقال ليه: صافي جيب ليا ولي أمرك
منين جات أم الولد، قال ليها المعلم: شوفي أ لالة، راني عييت مع ولدك... ديما كنرسم ليه هادا وكيقول ليه هباط
بقات المرا تفكر شوية وهي تقول ليه: إيوا أشنو بغيتيه يقول ليك؟ هبرديلة؟