شوف الدنيا ... -بقلمي-

من طرف medcherif03 السبت يوليو 16, 2016 10:52 am

الدنيا من شاوها بالبكي بدات...واتبكيك صغير في شاو المولد
قداه انمغرور اعطاتو صفعات...سقاية بامرار عمرها ماتسعد

العاقل مسكين يتفكر ما فات...و اللي سلفو قاع فيهم واش ايعد
ياسعدو من كان سابق للخيرات...غدوة عند الله عندو ما يوجد

ياعيني كفي عليا ذ الدمعات...ذا مكتوب الله امسطر و امجرد
يانفسي خليك توبي عالشهوات...لا من دامت ليه الدنيا و اخلد

الساكت نطقتيه واعطيتي دلات...وشبعتي من كان خاوي متجلد
فيقتي من كان جاهل بالحيلات...و امليتي لبطون للحرام اتهد

اسمطتي يافانية و بدلتي لوقات...قيمتي الدوني بالمال المجهد
جوعتي اسود هزلت و تنسات...و قدمتي لكلاب للمشوي تجبد

الدنيا كي جات الصفي ولات...عكست لي فدالتي و زهري صد
ولد البية هانتو و بيه استهزات...و الفكرون معاشراتو في الملبد

ولد الخيمة عاد مكسوبو معزات...و الراعي ولى القايد و السيد
ياسبحان الله واه فاضت واتعدات...وفضل اسمو(كذا) على محمد

حتى الذيب سرحت لو للنعيجات...اتمولك وعاد يصرف و ايعد
الجاهل في حالتو زادت درجات...و العالم اطفات شمعاتو واخمد

عرة قومي قدماتو في القعدات...ولد الأصل عاد فالكوري يقعد
مول الجودة عاد ياكل فالفضلات...والبخيل وكلاتو عالخبزة واجحد

بقلمي medcherif03

من طرف غريبي الإثنين يوليو 18, 2016 2:13 am

لجاهل في حالتو زادت درجات...و العالم اطفات شمعاتو واخمد
هذا حال الدنيا ، هي متقلبة ، كريمة ...جميلة..معطاء..جاحدة..ظالمة..
انها بؤرة للمتناقضات..ليل ونهار ، فقر وغنى..سعادة وشقاء ..حياة وموت.
شكرا على هذا النص الجميل الذي ينظر للحياة من باب التأمل في اسرارها ،وليس فقط من باب الاعجاب من مظاهرها..

شوف الدنيا ... -بقلمي-

شوف الدنيا ... -بقلمي-

رد: شوف الدنيا ... -بقلمي-