قصيدة الشوق

من طرف ربيعة السبت فبراير 08, 2014 4:34 pm

قصيدة الشوق
نظم الشيخ امحمد البوعمري

القسم الأول

أَبْدِيتْ بَاسْمْ اَلْمَوْلَى نَعْمْ اَلْغـْنِي اَلْمُتْعَالْ
فَالْمْوَاهَبْ نَسْتََعْطَ خَاتَمْ اَلرّْسَالِي
اِيْكْشَفْ لِي عَنْ خَدْرْ اَعْرَايْسُ اَلْفَعَّالْ
وُنَقْطَفْ مَنْ فَنّْ اَنْوَارُ اَبْقَلْبْ سَالِي
اِيْتَبَّتْ اَلْسَانِي مَانَضْحَى اَنْشَاهَدْ اَخْلاَلْ
اِكَمَّلْ اَرْجَايَا مُولْ اَلْجُودْ فِي اَسْجَالِي
اِعْمَلْ لِّي مَسْلَكْ بِجَاهْ تَاجْ لَرْسَالْ
اِيمَامْ لْورَى لَمْجَدْ مَنْ لِهْ شَاقْ حَالِي
هَاجْ وَجْدِي وَقْوَ شَوْقِي اوُقُلْتْ فَالْحَالْ
جِيتْ قَاصَدْ حُرْمَكْ خَوْفَانْ مَنْ اَزْلاَلِي
يَالْمَصْطَفَى غَارَ يَا اِمَامْ لـفْضَالْ
كْرَمْنِي بَالزُُّورَ نَرْتَاحْ مَنْ اَهْوَالي

القسم الثاني

نَادِيتْ اَعْلِيكْ جُدْ يَا مَفْتَاحْ اَلْجُودْ
اَتَاجْ اَلْمَرْسْلِينْ يَا سِيَّدْ لَسْيَادْ
حَاشَا حَاشَا اِيْخِيبْ مَنْ بَحْمَاكْ ايْلُودْ
نَالْ اَلْفَضْلْ اَلْعْظِيمْ وَبْلَغْ كُلّْ اَمْرَادْ
يَامَنْ رَبِّي اَعْطَاكْ لَمقََامْ الْمَحْمُودْ
وُكَرْمَكْ وفَضْلَكْ عَنْ سَايَرْ لَعْبَادْ
زَكًـْتْ افْحَرْمَكْ جُودْ يَا نَعْمْ المُهْتَادْ
كِيفْ نَسْعَى حُرْمَكْ نَعْمْ اَلْحْبِيبْ وَنْخِيبْ
كِيفْ مَا نَظْفَرْ شِي بَكْمَالْ كُلّْ مَرْغُوبْ
يَا الْمَخْصُوصْ اَبْلَوْفََا وَالصّْفَا وُتَقْرِيبْ
يَا مَنْ اَجْعَلْ لِكْ اَلْبُرَاقْ خِيرْ مَرْكُوبْ
يَا احْمَدْ مُولْ التَّاجْ مْعَ اللّْْوَ وَالْقْضِيبْ
كِيفْ مَا يَرْبَحْ مَنْ لَحْمَاكْ طَلْبْ مَطْلُوبْ
كِيفْ مَا يَسْعَدْ شِي مَنْ لِكْ شَاقْ وِتَالْ
كِيفْ مَا يَظْفَرْ بَمْرَامُ اِيْعُودْ سَالِي
كِيفْ يَرْجَعْ نَاكَدْ مَنْ فِي اَمْقَامَكْ اِسَـالْ
كِيفْ مَا يَتْرَقَّا لَمْرَاتَبْ اَلْمْعَالِي
يَالْمَصْطَفَى غَارَ يَا اِمَامْ لـفْضَالْ
كْرَمْنِي بَالزُُّورَ نَرْتَاحْ مَنْ اَهْوَالي

القسم الثالث

كِيفْ اَخَيْرْ الاَنَامْ يَا خَاتَمْ الارْسَالْ
مَانَجْزَمْ شِي اَبْمَا اَسْعِيتْ اَفْهَاذَا الّـِّيلْ
كِيفْ أَنْعَمْ الشَفِعْ مَا نَظْفَرْ بَمَالْ
وَنَا لَحْمَاكْ جِيتْ قَاصَدْ عَبْدْ اَذْلِيلْ
مَنْ قَصْدْ اَحْمَاكْ لاَغْنَا يَظْفَرْ ونَالْ
أَبَحْرْ اَلْجُودْ بِكْ يَعْمَلْ لِي تَاوِيلْ
مُولْ اَلْقُدْرَا اوُلا َيْحَافِينِي لَجْلِيلْ
لاَ ايَقْطَعْ اَرْجَايَا حَتَّى اَنْزُورْ لَمْقََامْ
ثَمّْ نَسْعى حُرْمَكْ وَنْقُولْ يَالْمَعْصُومْ
اَدْخِلْ بَالاَنْبِيَّا وبْحَقّْ جَاهْ أدَمْ
اَدْخِلْ بَالْحَسَنِينْ اَعْلاَجْ كُلّْ مَسْقُومْ
اَدْخِلْ بَزْوَاجَكْ وبْجَمْعْ اَلاصْحَابْ لَكْرَامْ
اَدْخِيلْ بَنْصَارَكْ يَا مَنْ لِكْ قُلْتْ مَضْيُومْ
اَدْخِلْ بَالزَّهْرَا وبْجَمْعْ لْشْرَافْ لَنْجَالْ
اَدْخِلْ بَصْهَارَكْ جَمْلاً وَاَلْهْمَامْ عَلِي
اَدْخِلْ بَالصَّدِّيقْ اُوعُمَرْ عَبْدَكْ بْلاَلْ
اَدْخِلْ لَكْ اَبْعَثْمَانْ اُو جَاهْ كُلّْ وَالِي
يَالْمَصْطَفَى غـَارَا يَا اِيْمَامْ لـَرْسَالْ
كْرَمْنِي بَالزُُّورَا نَرْتَاحْ مَنْ اَهْوَالي

القسم الرابع

اَدْخِلْ اَبْعَرْشْ وَالْقـْلَمْ كُرْسِي وَاللوحْ
وَجْمِيعْ الِّي انْزَلتْ فِي رَقْمْ اَسْطَارُ
وَبْحَقّْ اَمْلاَيْكْ السّْمَا وَبْحَقْ الرُّوحْ
فَالْفَرْشْ اُعَرْشْ وَالّْذِ خَلْفُ دَارُ
وَبْحَقّْ اَجْمِيعْ كُلّْ مَنْ يَقْرَ فِي لُوحْ
شَرْفَ وَعْوَامّْ كُلّْ وَحَدْ وَسْوَارُ
يَهْنَا قَلْبِي اِيْرِيحْ يَصْفَا تَكْدَارُ
اَلْهْوَ وَالشَّيْطَنْ اَقْوَاوْ بَالْمْكَايَدْ
لَبّْسُونِي حُلَّ بِهَا اَكْسَاوْ جَسْدِ
ثَقّْلُ عَنْ كَهْلِي وَعْيِيتْ مَا انْكَايَدْ
زِيّْرُ حَمْلِي يَـالَطِيفْ بَانْ جَهْدِ
مَلْكُونِي لَلنَّفْسْ اُولاَ وْجَدْتْ كًايَدْ
اِيْقُودْنِي بَزْمَامِ لَطْرِيقْ كُلّْ مَهْدِ
اَتْبَعْتْ نَفْسِي وَخْضَعْتْ اَلْهَا فْجَمْعْ لَحْوَالْ
اَثْقَالْ حَمْلْ اَذْنُوبي مَا صَبَتْ لِهْ وَالِي
اَطْغَاوْ عَنِّي قَهْرُونِي بَاحْ مَا فْلْدْخَالْ
اَفْشَاوْ سَرِّي شَطـْنُونِي كَثْرُ اَجْدَالِي
يَالْمَصْطَفَى غَارَ يَا اِمَامْ لـفْضَالْ
كْرَمْنِي بَالزُُّورَ نَرْتَاحْ مَنْ اَهْوَالي

القسم الخامس

غِيرْ اَنْتَ يَاكْرِيمْ لاَغَيْرَكْ نَرْجَاهْ
خَفَّفْ حَمْلِي اوُ شُوفْ مَنْ تَعْبْ اَشْقَايَا
طَهَّرْ قَلْبِي اَمْغِيثْ فَالْحِينْ اَمْنَ اَدْعَاهْ
وَشْرَحْ صَدْرِي اُو لا َتْعَامَلْ بَخْطَايَا
وَسْتَرْعَيْبِي اَبْخِيرْ خَلْقََكْ يَاذَا اَلْجَاهْ
وَعْفُ عَنِّي اُو لاَ تْخِيَّبْ مَسْعَايَا
مَا دَامْ اَلْحَالْ فِيكْ مَوْلاَيْ اَرْجَايَا
لاَتَقْطَعْ اَرْجَايَا حَتَّى اَنْلُوحْ لَوْزَارْ
يَارْحِيمْ اَرْحَمْتَكْ نَسْعَاكْ يَالْغَفـُورْ
لاَتْخَيَّبْ قَصْدِي نَعْمْ اَلْغْنِي اَلْغَفَّارْ
لاَ تـْوَاخَذْنِي بَفْعَالِي اَفْيُومْ لَنـْشُورْ
لاَ اَتْرَدّْ اَدْعَايَا مَقـْهُورْ يَالْقَهَّارْ
لاَ تْعَاتَبْنِي يَوْمْ اَنْرُوحْ لِكْ مَقْـْهُُورْ
سُرْخْتََكْ مَوْجُودَا وَفْضَلْكْ يَا ذَالْجْلاَلْ
مَايْلُ مَفْتَاحْ اوُلاَ لِه سُورْ عَالِي
مَا اَطْلَبْتْ اَدْرَكْنِي فَالْحِينْ دُونْ تَعْطَالْ
اَنْشَرْتْ كَفِّي وَشْكِيتْ َدْعََايْ سَعْدْ فَالِي
يَالْمَصْطَفَى غَارَ يَا اِمَامْ لـفْضَالْ
كْرَمْنِي بَالزُُّورَ نَرْتَاحْ مَنْ اَهْوَالي

القسم السادس

كِيفْ اَرَاسِي اَنْخِيبْ وَنَا بَالْهَادِ
سَتْغَتْ اَشْفِعْنَا اَلْمَاحي مُحَمَّدْ
بِهْ اَتْنَالْ اَلْكْرَامْ فِي ذِكْ وُهَاذِ
بْهْ اَتْبَلْغْ اَلْمْقَامْ نَعْمْ اَلْمُمَجَّدْ
بِهْ اَجْزَمْ مَنْ اَسْعَى اَمْقَامُ مَنْ هَادِ
يَمْشِي لحْمَاهْ دُونْ تَوْخِيرْ اَمْقَصَّدْ
نَاظَمْ لَبْيَاتْ قَالْ وَالشَّوْقْ اَمْجَدَّدْ
يَااِلَهْ اَسْاَلْتْ اَبْيَاتِي اَتْكُنْ مَفـْتََاحْ
لَلْذِ يَحْفَظْهَا وَلْجَمْعْ مَنْ اَصْغَاهَا
كَانْ غَافَلْ يَتـْيَقـَّظْ مَنْ اَسْهُوهْ لَصْلاَحْ
كَانْ شَايَقْ يُوصَلْ لَمْقَامْ حُرْمْ طَهَ
وَالسّْلاَمْ اَنْهِيبُ لَشْيَاخْنَا الرَّجَّاحْ
اَلْعَارْفِينْ اَرْبَابْ التَّحْقيقْ وَنـّْبَاهَا
وَالاْشْرَافْ أُوَ ودْبَا جَمْلاَ اَكْهُولْ وَطْفَالْ
بْطِيبْ مَسْكْ أُعَنـْبَرْ وَزْهَارْ وَاَلْغْوَالِي
يَاللَّهْ دْعَايَا بَفْضَلْكْ رَدْتّْ يُقْبَالْ
قَابْلُ بَحْسَانَكْ وَالْجُودْ يَالْعَالِي
وَالصّْلاَ وَالسّْلاَمْ اَعْلَى اِيمَامْ لَرْسَالْ
سِيدْنَا مُحَمَدْ بَحْرْ السّْخَا اَلْمَالِي