منتديات جبالة Montadayat Jbala
عزيزي الزائر / عزيزتي الزائرة يرجي التكرم بتسجبل الدخول اذا كنت عضوا معنا
او التسجيل ان لم تكن عضوا وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي

نوانا ذ الحال =بقلمي=

استعرض الموضوع السابق استعرض الموضوع التالي اذهب الى الأسفل

نوانا ذ الحال =بقلمي=

مُساهمة من طرف medcherif03 في الخميس أغسطس 11, 2016 9:54 am

نوانا ذ الحال لابى يسقم****و اتبرهش ولى تابع لامواليه
يشح الصب واسحابو يتلم****من البعد يبان غبارو كاسيه

تسمع للمرعود بالصوت يدمدم****والبراق يبان للبعد امضويه
اسفحل جفاف فالأرض و عم****البركة امشات و صدت آلهيه

يا شومة وعلاه بينا يتلطم****كل مرة كيفاه انهارو باديه
في ساعة وحدة يصحى و يغيم****متغير حالو ديمة بلا تنبيه

واش نقولك يابني ما نتكلم****وين ندرق هم انا ضايق بيه
عالمنكر مانيش طايق وامنجم****مقواها لمطار ذ البر اتجافيه

يا سبحان الله القرن اتهدم****و الكعوالة ولات لعمامة تنهيه
مالباطل تيبس الخضرة تحطم****وسط الما يصفار العود يرشيه

ولات النسوان فينا تتحكم****والراجل ذلو ذالوقت امنويه
المبخوسة ولات هيا تتقدم****والحرة يوخروها واش عليه

البغلة دلعوها رجعت تتنعم****الفرس خلاوها للزرع تسقيه
دوخني جاهل يبدا يتقرضم****بكلامو شوفو العاقل يحشم بيه

حيرني عالم ساكت متكتم****يدري بالعلوم لسانو ما يلويه
السافيه آحماق رجعوه امعلم****الفاهم اسخسرو لقرايا فيه

الدنيا عطفت للناقص تكرم****لبساتو لحرير من قرنو آلكرعيه
و عطاتو دلات ولى يتفيهم****ينهي عالمنكر و غارق لوذانيه

حتى الطير الحر ولى يتهرقم****اللي مايعرف قيمتو عالجمر يشويه
و البومة ولات فالحب اتخمم****تعشق ولد الطير واتحوس عليه

السارق كلفوه للزكاة يلم****يحظي لمانة و الغاشي يعطيه
الذيب اتمسكن للسرحة يحلم****الجياح خلاص راهم ثاقو فيه

المنافق عاد بالمظهر يخدم****نيفاقو في باطنو عنهم خافيه
عرة قومي ساد ولى يتقيم****هو سيد القوم والناس اتناديه

يابن عمي شاب راسي من ذالهم****كل يوم يزيد الباطل يدحيه
الباطل لبسوه ثوب الحق وعم****ها بلاك تعود تغلط و اتعاديه

حيرنا ذالحال فالحق يكمم****الباطل سرج و دلاهم كرعيه
ألطف يا لطيف بينا واتكرم****لا تاخذ بمادار فينا ذ السافيه

مطر الرحمة ياالله لينا ترحم****يحمل بري يا الله و نتنزه بيه
الحجرة والشجرة ولبهيمة تسلم****و ينور بري والعشبة تكسيه

والبدوي يزهى ويرجع يتبسم****اتجيه الفرشة يضحك من عينيه
تسعد صحرتنا و يعمر ذالمرسم****الضاية واجباب الغاشي تكفيه

[size=18][size=32][size=24]اتنور لفجوج بازهار الموسم****اتعم الخيرات و الرحمة تسقيه
يكثر لو ترفاس لشاهي بلسم****و صيادة لدمي البدوي تلهيه
[/size][/size]

طالب دعوة خير من بوياوالعم****يخضار اجناني و نا نفرح بيه
سيدي ربي خالقي لينا تعزم****فرج ع الأمة و ذ الغم اتفاجيه

ابجاه الصلاح واللي هو قايم****معمر بيت الله بالذكر يناجيه
ابجاه القرآن اومن بيه اختم****احفظلي وطني من العديان احميه

ذا محمد كاتب القول امرقم****طامع في المولى بالستر يغطيه
احفظلي لعيال و معاه العارم****شمعة بيتي هي نوارة اتضويه

لاتحرم عبدك بالزورة يحلم****البيت العتيق شاهي نصفى ليه
ارجايا في الله لايحرم مسلم****قبل فراق الروح والجسد اتخليه

يا ربي رحمتك البويا و الأم****و ارضى عنهم يالله هنا والهيه
هذا قع والموت ورانا تختم****و مهما طال الحال فالآخر تفنيه

صلي ياربي على طه الاكرم****نختم هاذ القول بألف صلاة عليه


تمت بقلميmedcherif03

قاموس الكلمات

نوانا ذالحال لابى يسقم- زعفنا ذالحال مابغى يتعدل
اتبرهش- استوحش و تغيرت طباعه
ياشومة- يا عجابة
طايق و امنجم- لا اقدر و لا استطيع
ندرق- نخبي
القرن- قرن الثور
كعوالة- ذيل البهيمة
المبخوسة-أرذل النساء
يتقرضم-يتفاوت في الكلام
يتهرقم- يؤكل
عرة قومي- أرذلهم و أسوأهم
يدحيه- يدحره و يستحقره
الفرشة- عام جميل فيه العشب و الكلأ للبهائم
الضاية- مكان يرتع و يمتلء بالماء و العشب
اجباب- مكان كالبئر يحفر في الصحراء و يمتلء ماء عندما تمطر
يخضار جناني- يصلح حال أولادي و ينور بالخير
الشاهي- الراغب
 لدمي- نوع من الغزلان




[/size]


medcherif03
عضو نشيط
عضو نشيط

الجنس : ذكر عدد المساهمات : 43
درجة التقدير : 0
تاريخ الميلاد : 30/09/1964
تاريخ التسجيل : 18/04/2016
العمر : 52

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى