يا سهلا بهاذ القمر... *بقلمي*

من طرف medcherif03 الإثنين أبريل 18, 2016 12:06 pm

يا سهلا بهاذ القمر عليا طل.....بدر النصفية الكامل في لوصاف

يا محلا ذيك السمايم كي لعسل.....نسبتها عربي مأصل من لشراف

مقواه الا كان عقلي راه اشل.....من شوفتها يا الخاوة عدت نخاف

هاذ الآية في زينها لا يتمثل.....وداروها لجيال محاجية لتخراف

من نظرتها شحال من قايد ذل.....ومن طولتها يروح امتلف تتلاف

مافيهاش عيوب شينة ماتتمل.....ماتلقى فيها نقيصة لا تقصاف

مربوعة في القد اخفيفة فالضل.....مقدودة لسباك عريضة في لكتاف

في الطولة نخلة ما تتعبر بانخل.....دقلة نور اللي موكل للتضياف
في البنة عسلة اضايقها يحصل.....عسل النحلة الليمربي في لرياف

يا لايمني طارلها قلبي وانزل.....لابى يرجع لي معاها دار احلاف

مقواه الا كان جسدي راه اهزل.....و يونسني خيالها عني طواف

يا سايلني في هواها لا تسأل.....لاتهوض لجراح زادوني تضعاف

قالوا ما تعيا امتبعها و اتزل.....ساعفنا خليك من هاذ التعياف

قلتلهم مانطيق ننساها بسهل....ماهو رايي راه ذالقلب السياف

حاتمني لرموز صعبة ما تتحل.....عييت نطاوع فيه احسبتو عراف

مانقدر نقول هاذ القلب اهبل.....وعاد يهاذي في كلامو بالتخلاف

ياخوتي عقلي اتلى عنو و اسل.....لامن ينصرني ولا من عني ناف

يا وخذي شيان حالي و اتبهدل.....و تغير لوني على ضريفة لخفاف

ياسبحان الله سيدي واش يعمل.....في خلقو عجب دارلها تنحاف

ذا ماراد الله في صنعو يفعل.....و اجعل لي للقلب وناسة تتضاف

فتنت لي عقلي و الفكر اتخبل.....مقواه امديسي و كثرت لو لصناف

شعرغرابي كي الظلمة طاح اسبل.....ع جبهة قنديل فوقو دار احقاف

الحاجب و العين مليانة بكحل.....و الشنوفة طابعتهم في التخناف

اشفايف و اخدود بنعمان و فل.....المبسم مصموت يحلف في الشواف

الرقبة صاري الما منو طل.....طبعوها ذوك السوالف نعت لحاف

صدرك طحطاحة للفارس ينزل.....موالف بالعودات فالركبة خطاف

غرسو لو تفاح للخاوي موكل.....ويحاذر روحو خوف من المنداف

الجوف المطوي عندك كيتوصل.....اسوكى بلاك تتغر ابلرداف

راحة في المكان بلاك اطول.....خفف في زورة خليها تخفاف

المورد معروف فيه الما يجمل.....من شربة وحدة يملي بالغراف

يا تمحاني منين يروى يتعدل.....ما يتمل شراب ماها ما يتعاف

صانع متمكن في صنعو متماهل.....طاعت لو علوم يحرفها تحراف

عذروني لاكان في وصفي ندقل.....هاذ القمرة شوفها محنة وزعاف

من نشوتها في هلاكي متعلل.....خلوني في حالتي نا عقلي صاف

هذا حال العاشق ديمة متبهدل.....حليلو مسكين راه عندو ماشاف

يا عاقل لا تلوم مسجون مسلسل.....في غرام ام بريم نوارة لعطاف

قاضيها نفاني في حكمو عول.....واقسى عني راه درباني من كاف

ارماني في برور نعيا ما نوصل.....قطعات ابعاد كودة ع الخواف

يامضنوني من اغدى ليهم يهمل.....على شوفات العين تلفهم تتلاف

الله لالي شيهان عربي و مأصل.....في الفزة بارود يزرف تزراف

أدهم حامق ليلي في لونو يشعل....الحافر انحاس يلهد في التقراف

سرجو فيلالي في صنعو يكمل.....مطروز امذهب من صنعة حراف

من راس العين ميرادو مانغفل.....و عودي في شراب الما ء عياف

مخلط قوتو من الصحرا و التل.....وعوينو مغلوث من خيار اتعلاف

ياعودي ذا نهارك فالسيرة تعجل.....فالفهوة يطوي الويدان و لجغاف

و البدة اربيع نوارها يخبل.....والدير المسبوك ع البادرة لحاف

وركابو قنديل ع الخف امسهل.....لشبورو نجام ع الرشخة يحراف

يرجعني لوكار ولفي ياراجل.....يفاجي عن هموم حاملها و زعاف

في رمشة مالعين بيا نا يوصل.....نتمسى في بر مقدودة لطراف

وحش العارم غيرمن شوفتها نذبل.....ويريح قلبي من غبنو يخفاف

يرجع دمع العين الوادو يحمل.....اتنور لفصول و يزهارو لعراف

نزهى انا وخليلتي فرحة واطبل.....و نديرو وعدة اشنانة فالجحاف

و طلبك ياربي ذالفرحة تكمل.....تسقم أيام لمحبة ما تعناف

أهلي و احبابي و الناس اكل.....العلفة و البارود و الخيالة ترداف

تمت بقلمي يوم 13-05-2004

medcherif03

من طرف medcherif03 الثلاثاء أبريل 19, 2016 8:37 pm

السلام عليكم

أين الردود يا جماعة؟؟؟

الله يستركم من كل سوء

من طرف غريبي الثلاثاء أبريل 19, 2016 10:56 pm

شكرا على تفضلك بتقاسم نصوصك معنا ، ومرحبا بكل جديد..وأما بخصوص الردود فقد يعود ذلك الى اختلاف الاهتمامات لدى الأعضاء ، فكل يترك بصمته على ما يتقاطع مع ميولاته، لكن هذا لا يمنعهم من القراءة والاستفادة والاطلاع على كل جديد..فانا مثلا من عشاق الشعر الفصيح لكني أطالع ما ينشر من زجل كمعجب بكل كلمة رقيقة ومعنى جميل مثل ما تفضلت به صديقنا الجديد.فواصل وتجاوز عنا صمتنا فهو علامة رضا خاصة ونصوصك سيدي من العيار الثمين.

وها واحدة مما توقعناه ..
لست ناقدا ..
إنما أستطيع القول : أنني ذواق..
ومن سنحت له الفرص والأيام للمداومة على الحضورأيام الزمن الجميل لأمسيات الزجال أحمد لمسيح مؤكد سيكتسب ما به يزداد تذوقا لهذا الصنف الأدبي الجميل.. شكرا على الإطلالة.

من طرف medcherif03 الأربعاء أبريل 20, 2016 8:20 am

السلام عليكم

مروركم أسعدني و نور صفحتي بارك الله فيكم على التشجيع الجميل و القيم
فوالله صراحة الردود تشجع على الكتابة و المداومة و من الجميل أيضا أن تجد من يتابع
كلماتك و محاولاتك و تحس بالثقة المتبادلة

ألف شكر

يا سهلا بهاذ القمر... بقلمي